EN/EW/1699

verbatim

The quhilk day, the forsamekill as the Quenis Grace, my Lord Governour, and Lords of Secreit Counsel, being rememberit of the monyfald actis of Parliament, and diverse utheris actis and statutis maid in Prive Counsel, and uther wais proclamationis direct thairupoun for stanching of regrating, and forstalling of mercattis and faris, to the effect that all maner of gudis suld be first presentit to the mercat, and byd mercatt tyme of day, and sauld in plane mercat lik as in the actis maid thairupoun is at mair lenth contenit. Nochttheles the saidis actis and statutis ar nocht observit and kept, bot all gudis ar regratit, and all mercattis and faris forstallit, swa that na maner of gudis can be had nor coft bot at the thrid hand, to the greit velipentioun and lychtlying of the saidis actis. And attour, and for rameid heirof in tymes to cum, it is divisit, statute, and ordanit, that the saidis Actis of Parliament maid anent forstallaris and regratouris be observit and kepit, and put to executioun, to all poyntis efter the form and tennour thairof; and that lettres be direct our all partis of this realme, to mak publicatioun thairof at all places neidfull, sex dais befoir ilk fair in dew forme as effeirs. And becaus of the nixt fair callit Trinite Sounday fair, usit to be haldin in Brechin, is approchand, and mony gudis ar commonlie usit to be sauld thereat ordanis Robert Carnegy of Kynnard to pas, vesy, se, and considder that the saidis actis be observit and kepit, and that all forstallaris and regratouris be serchit, socht, and apprehendit, and all gudis coft, forstallit and regratit be thaim, to be eschaetit and inbrocht to our Soverane Ladys use, and the brekaris of the saidis actis to be punist conform to the samyn, and panis contenit thairintill. And to the effect that the saidis actis may be observit and kepit in all tymes to cum, ordanis the Provest, Alderman, and Ballies of every burch and toun quhair ony faris or mercattis ar usit to be haldin, that thai, and ilkane of thame, sex dais befoir ilk fair day, send furth certane sercheouris and visitouris to se gif ony sik regratouris happynis to cum to the saidis fairs and mercattis, and thair mak publicatioun of the saidis actis of parliament, and caus the samyn be observit and kepit in all poyntis, under the pane of tynsel of the Provestis office, and siclik the Ballies of thair offices, and jc li usuale money to be upliftit of thair gudis and inbrocht to our Soverane Ladys use, als oft as thai failye in the executioun of this act.

summary

Regarding legislation against forestallers and regraters at markets. Mention of forthcoming Trinity Sunday fair at Brechin

folio/page

141-2

charter period

None

charter date range

19/6/1553 - ??

document reference

DO/EW/1365